پاکستان تحریک انصاف کے چیئرمین اور سابق وزیر اعظم عمران خان کا کہنا ہے کہ مکمل لندن پلان سامنے آ چکا ہے۔
سوشل میڈیا پر بیان جاری کرتے ہوئے عمران خان نے کہا کہ ان کی گرفتاری کے بعد جو پرتشدد واقعات ہوئے انہیں اب بہانہ بنا کر ان پر بغاوت کا مقدمہ قائم کیا جا ئے گا تا کہ انہیں دس سال تک جیل میں ہی رکھا جا سکے۔
عمران خان کے مطابق لندن پلان کے تحت ان کی اہلیہ بشریٰ بیگم کو جیل میں ڈال کر ان کی بے توقیری کرنے کی کوشش کی جائے گی۔
سابق وزیر اعظم عمران خان نے الزام عائد کیا ہے کہ حکمرانوں نے جج، جیوری اور سزا پر عملدر آمد والا کردار بھی خود ہی سنبھال لیا ہے۔
ان کا کہنا تھا کہ سپریم کورٹ کے باہر جے یو آئی ف کا ڈرامہ کیا جا رہا ہے، اس کا صرف ایک مقصد ہے تاکہ چیف جسٹس آئین کے مطابق فیصلہ نہ دیں۔
عمران خان نے کہا کہ خون کے آخری قطرے تک لڑوں گا ، ان کی غلامی سے موت بہتر ہے۔